Повеќе од 1 милион дози анти-ковид вакцини досега се аплицирани во земјава. Според министерството за здравство станува збор за 1.016.700 дози, а ревакцинирани се повеќе од 454.000 граѓани. „Вакцинацијата на пунктовите се одвива непречено и со зголемен интерес, а новоотворените пунктови ја дисперзираа зголемената работа на медицинските лица во поликлиниките и го смали редот на чекање за граѓаните. Вакцини има доволно од сите производители, а на неделно ниво со нови пратки истите се надополнуваат“, информираше министерот Филипче. И тој и министерството признаваат дека по најавата за нови рестриктивни мерки кои ќе стартуваат од наредната недела се повеќе граѓани се пријавуваат за вакцинација. И денеска имаше редици пред вакциналните пунктови.
Додека дел од граѓаните брзаат да се имунизираат, податоците на министерството за здравство покажуваат голем скок во новозаразени случаи и починати поради што и се преземаат нови рестриктивни мерки, особено во делот на работата на угостителските објекти кои меѓудругото предвидуваат влез само за вакцинирани. Опозицијата продолжува да обвинува за доцни и несоодветни чекори на надлежните.
Наместо глупави дискриминирачки мерки од фашистичката матрица на СДСМ, треба да се носат ефективни мерки за справување со корона вирусот.Арсовски, ВМРО- ДПМНЕ
„Наместо глупави дискриминирачки мерки од фашистичката матрица на СДСМ, треба да се носат ефективни мерки за справување со корона вирусот. Замислете, власта го достигна лудилото и тоа со само еден потег. Велат, само вакцинирани ќе може да одат и да седат во угостителските објекти, а овие невакцинираните не смеат.“, изјави Димче Арсовски, ВМРО- ДПМНЕ.
Во ситуација кога се зголемува бројот на инфицирани и се најавува нов бран на делта-варијантата и тоа во пресрет на стартот на учебната година, министерството за образование најавува дека се подготвува за почеток на наставата на 1 септември и дека во игра, во зависност од епидемиолошката ситуација, се 3 сценарија. Првото, е целосно отворање на училиштата за сите ученици. Второто, предвидува комбинирана настава – дел од учениците да посетуваат настава со физичко присуство под посебни протоколи, а дел да реализираат онлајн-настава. Третото сценарио е ротирање на учениците на една недела со физичко присуство во училиштата. Според надлежните околу 60 проценти од вработени во училиштата, досега се вакцинирани.